اصنع بعجينة واحدة ثلاث انواع بيتزا

السلام عليكم ورحمة الله وبركاتة

هنيه بحطلكم تطبيقي لعجينة البيتزا لمنال العالم (اللي حطّتها الأخت أم
العلاء الله يعطيها العافية)والصراحه بدون مبالعة أحلى عجينة بيتزا سويتها
رووووووووووووعه وخفيفه يعني مب دسمة وايد..واحين كلة اسوي بيتزا منها

أول شي بحطلكم صلصة البيتزا اللي سويتها (طبعا أنا خذتها من عالم حواء من
زماااااااااان بس هاي أول مرة أجربها وطلعت حلللللللللوة مثل صلصلة البيتزا
اللي نشتريها جاهزة)ومقاديرها:

1 علبة معجون طماطم(135غ)
4 فصوص ثوم مهروسه
2 م ك زيت
2 م ك جبن كاسات(مثل كرافت أو بوك)
1 م ك أوريغانو
1 ك ماء
ملح وفلفل أسود حسب الرغبة

الطريقة:


- يشوح الثوم مع الزيت في مقلى كبير حتى يحمر قليلا.
- يضاف إلية معجون الطماطم والملح والفلفل الأسود والأوريغانو ويحرك على نار هادئة.
- يتم إضافه الماء حتى الغليان.
- ثم يتم إضافة الجبن مع استمرارية التقليب.
- تترك على النار الهادئة 3-5 دقائق وتصبح جاهزة.
وهاي صورة الصلصة..




# مقادير العجينة:


2/1-2 ك طحين(أنا أضفت2 م ط لأنها كانت لينة)
1 م ك خميرة
1 م ص ملح
1 م ك سكر
4/1 ك زيت زيتون
1 ك ماء دافئ

# الطريقة :



1- يوضع في العجانة 2 كوب طحين فقط في البداية ثم الخميرة و السكر و الملح و تخلط
2- يضاف الماء الدافئ و الزيت زيتون و يخلط ثم يضاف باقي الطحين تدريجيا حتى تتكون العجينة
3- تكور و تترك تخمر
4- يرش سطح طحين و ترش العجينة بالطحين و تفرد بالنشابة على حجم صينية البيتزا
5- و تترك ترتاح حوالي 15 دقيقة
8- تدخل الفرن في حرارة 190 من 15 : 20 دقيقة حتى تأخذ لون ذهبي
9- تنقل على طبق التقديم..


نبدا بالنوع الأول ..


بيتزا بالدجاج محشية بالجبن..(هاي روووووووووووعه كل مرة أسويها تخلص بسرعه)..
1) بعد ما خمرت العجينة نرقها على السطح وبعدين نحطها في صينية البيتزا
لتأخذ شكلها ونرفعها من الجوانب مثل الصورة عشان نحشيها جبن ونعمل بالشوكة
ثقوب على السطح عشان تطلع البيتزا متساويه بعد الخبز ونتابع بالصور.





2) نحشيها بالجبن..أنا حشيتها بجبن حلوم..ممكن تحشونها بأي نوع جبن..





3) بعد ما نحشيها نسكر الجوانب اللي فيها الجبن مثل الصورة..




4) نمسح الوجة بالصلصة اللي سويناها..لاحظوا الجوانب المحشية ما نمسحها بالصلصة..




5) نضع قطع الدجاج فوق الصلصة وطريقتة(أول شي تحمسون البصل مع الزيت حتى
يذبل بعدين تضيفون قطع الدجاج المقطعة قطع صغيرة جداً وتضيفون الملح
والفلفل الأسود وتحمسون لين ما يسوي الدجاج)..




6) تضيفون جبن موزاريلا مبشور فوق الدجاج..




7) ادخلونها الفرن حتى نتضج وهاي صورتها بعد ما طلعتها من الفرن روووووووووووعه..



..نتابع النوع الثاني..


بيتزا بالخضار..

1) نرق العجينة على قياس الصينية ونعمل الثقوب بالشوكة .. ونسمحها بالصلصة..




2) نضع الخضروات عليها أنا بس حطيت زيتون أسود وطماط..




3) نضع الجبن موزاريلا فوق الخضروات..




4) ندخلها الفرن حتى تنضج.. وهنية صورتها مع بيتزا الدجاج..






النوع الثالث والأخير..

بقى عندي صلصة ودجاج زيادة وسويت منه فطاير بيتزا بالدجاج..

1) ترقون العجينة على شكل بيضاوي.. أو دائري..




2) تمسحون بالصلصة بس على جانب واحد مثل الصورة..وتحطون فوق الصلصة قطع الدجاج.




3) بعدين نيبون الطرف اللي غير محشي وتسكرونة على الحشوة..وترصون بالشوكة على الأطراف عشان ما تنفتح بعد الخبز..






4) تحطون الفطاير في صينية الخبز وتدهنون الوجه بالبيض المخلوط مع الحليب وترشون شوي سمسم (حسب الرغبة)





5) تدخلون الصينية الفرن حتى تنضج الفطاير..بعدين تقطعونها قطع صغيرة بالعرض مثل الصورة..شوفو كيف شكل الحشوة من داخل..